Bizikasi ekimenak lagundu nahi du ikastetxeak elkarbizitza positiborako espazio seguruak bilakatzea, hau da, inolako jazarpen-egoerarik onartuko ez dutenak. Izan ere, hori lortzea ezinbestekoa da hezkuntza sistemaren xede nagusia betetzeko: ikasle guztien garapen pertsonalean lagundu eta konpetentziak eta tresnak ematea herritar aktibo eta arduratsu gisa parte har dezaten gizartean.

 

Zalantzarik gabe, horixe da denok lortu nahi dugun azken emaitza. Zentzu horretan ekimenaren helburua desideratum bat da, etorkizun ideal bat, baina jarraitu beharreko bidea ere erakusten digu, eta egin beharreko esku-hartzeen norabidea.

Helburu hori lortu ahal izateko, nahitaezkoa izango da elkarlana eta gizarte- eta hezkuntza-komunitateko eragileen parte-hartzea Bizikasi garatuko den eremuetan. Ekimena bera topaleku gisa ulertzen dugu, guztiek elkarrekin ikasteko eta prestatzeko aukera bat eman diezaiogun gure buruari gizarte eta hezkuntza fenomeno konplexu eta ondorio larrikoa ere izan daitekeen honen inguruan: eskola-jazarpena.

Aurrera begira dugun egitekoa aukera gisa ulertzeak, elkarbizitza positiboari buruzko ezagutza eta esperientziak partekatzea dakar, hala nola hezkuntza-jardunari buruz hausnartzea eta, alderaketa eta ekarpen arduratsuak oinarri hartuta, zoru komun bat ezartzea. Hala, konstruktu bat sortuko dugu eskola-jazarpenari modu sistematikoan eta hezkuntzaren bidez aurre egiteko, eta elkarbizitza positiborako dinamikak sustatuko ditu, edozein indarkeria mota agertzea ekidite aldera.

Eskola jazarpena egoera ebaztean Bizikasik pertsona barruko eta pertsonen arteko harremanak berreskuratzeko eredua hartzen du oinarritzat, eta eredu sistemiko-ekologikotik eta genero analisitik garatuta dago. Gure ustez, orientazio horri esker, Bizikasik barnean har ditzake euskal ikastetxeek elkarbizitza positiboa garatzeko eta jazarpena errotik ezabatzeko azken urteotan egin dituzten eta egun ere egiten ari diren jarduketa eta programa espezifikoetako asko. Ikuspuntu hori kontuan hartuta, jarduketa horien babes-geruza bihurtuko da, eta, era berean, jarduketen norabidea zehaztu eta aberasten du, paradigma hezitzaile-berritzaile eta sistemiko-ekologikotik abiatzen baita. Ikusmolde hori kontuan hartuta, jarduketak proposatu, eta ekimenaren tresnak diseinatzen dira.

 

GEHIAGO JAKITEKO BIZIKASI EKIMENAREN INGURUAN

BIZIKASI EKIMENAREKIN NAHI DUGU

HEZKUNTZA KOMUNITATEKO ERAGILEAK ESKOLA JAZARPENAREN INGURUAN SENTSIBILIZATU ETA KONTZIENTZIATZEA PRESTAKUNTZAREN BIDEZ

IKASTETXEETAN EGITURA BAT SORTZEA, BAT TALDEA, ESKOLA JAZARPEN KASUEN EBAZPENA GIDATZEKO ETA ELKARBIZITZA POSITIBOA ERAIKITZEKO PROPOSAMENAK EGINGO DITUENA

IKASLEAK AHALDUNTZEA ELKARBIZITZAREN AURKAKO JARREREN ARAUTZAILE ETA KALTETUTAKO HARREMANEN BERRESKURATZE-PROZESUKO PROTAGONISTAK IZATEKO

IKASTETXEAK GARAPEN PERTSONAL ETA ELKARBIZITZA POSITIBOKO GUNE SEGURUAK IZATEA

BAT, BULLYING-AREN AURKAKO TALDEA

Eskola jazarpenaren aurkako inplikazioaren garrantzia gizarteari helarazi beharraz jabeturik, Bizikasi komunikazio kanpaina eta guzti dator.

Mozorroa kenduko diogu bullying-ari” lelopean, eskola jazarpenak jolasaren, txantxaren edo une bateko tira-biraren mozorroa hartzea saihesteaz kontzientzia zabaldu nahi da gizartean, ekimen honen bidez.

Lehentasunezkoa da eskola jazarpena pairatzen duenari laguntza ematea, baina era berean, garrantzitsua da jokamolde jazarlea duen ikasleari ere laguntzea, mozorro hori erantzi dezan, eta sortu duen minaz jabetu dadin.

Eta zeregin horretan, guztion inplikazioa behar da.

Kanpaina honek gonbidapena luzatzen dio gizarte guztiari, BAT – Bullyingaren Aurkako Taldearekin bat egiteko, hasi ikasle eta irakasleekin, segi familiekin eta lagunekin, eta gizarte guztiarenganaino.

Iragarkia Elorrioko ikastetxe publikoko eta institutuko ikasle, irakasle, zuzendari eta familien laguntzari esker grabatu ahal izan da.